काठमाडौं । फेसबुक, इन्ष्टाग्राम र ह्वाट्सएपको माउ कम्पनी मेटाले विश्वभरबाट केही कर्मचारीलाई कामबाट निकाल्ने भएको छ । यसमा कम्पनीमा सबैभन्दा कम प्रदर्शन गर्ने ५ प्रतिशत कर्मचारीलाई निकाल्न लागिएको कम्पनीले बताएको हो ।

आफूले कम्पनीका नियमित प्रदर्शनमा आधारित रहेर सबैभन्दा नराम्रो प्रदर्शन गर्ने कर्मचारीहरूलाई निकाल्ने क्रम तीव्र बनाउने निर्णय गरेको कर्मचारीहरूलाई पठाइएको मेमोमा कम्पनीका हाकिम मार्क जुकरबर्गले भनेका छन् । यसरी निकालिएको कर्मचारीको ठाउँमा यो वर्षको अन्त्यतिर नयाँ कर्मचारी राखिने पनि उनले बताएका छन् ।

विश्वभर मेटाका ७२ हजार कर्मचारी छन् । कुन श्रेणी वा स्थानमा कति कर्मचारी कटौती हुन्छ भन्नेबारे मेटाले कुनै जानकारी दिएको छैन । कम्पनीको यस निर्णयबाट प्रभावित अमेरिकामा काम गर्ने कर्मचारीले फेब्रुअरी १० भित्रमा यसको जानकारी पाउने मेमोमा जुकरबर्गले भनेका छन् । अमेरिका बाहिरका कर्मचारीलाई भने यसबारे पछि थाहा दिइनेछ ।

प्रदर्शनको स्तर मापन माथि उठाएको अनि सबैभन्दा नराम्रो प्रदर्शन गर्नेलाई छिटो छिटो कम्पनीबाट निकालिने पनि जुकरबर्गले बताए ।