काठमाडौं । द योङ ब्रदर्श क्लब इटहरीको आयोजनामा आगामी माघ १९ गतेदेखि दोस्रो स्व। कृष्णप्रसाद भट्टराई स्मृति गोल्डकप आयोजना हुने भएको छ । मंगलबार पत्रकार सम्मेलन गरी प्रतियोगिताबारे जानकारी दिइयो ।

क्लबका अध्यक्ष विजय सुब्बाका अनुसार आगामी माघ १९ गतेदेखि इटहरी ५ मा रहेको जनता बहुमुखी क्याम्पसको खेल मैदानमा प्रतियोगिता आयोजना गर्न लागिएको हो । प्रतियोगितामा आठ वटा टिम सहभागी हुने उनले बताए ।

उनका अनुसार प्रतियोगिताको विजेता टिमले नगद दुई लाख ५० हजार प्राप्त गर्नेछन् भने उपविजेता टिमले नगद एक लाख ३० हजारमा चित्त बुझाउनेछ ।

अघिल्लो वर्ष विजेतालाई दुई लाख २२ हजार प्रदान गरिएको थियो भने उपविजेताले एक लाख ११ हजार रुपैयाँ प्राप्त गरेका थिए । तर, यस वर्ष पुरस्कार राशि बढाइएको सुब्बाले बताए ।

खेललाई इटहरी उपहानगरपालिकाले संयोजन गरेको छ भने कोशी प्रदेश खेलकुद विकास बोर्डले संरक्षण गरेको खेल संयोजक विकास केसीले बताए । उनका अनुसार अघिल्लो वर्ष प्रतियोगितालाई पारदर्शी बनाइएका कारण यस वर्ष पनि फुटबल प्रतियोगिताको तयारी गरिएको हो ।

यहाँको सबैभन्दा पुरानो उक्त क्लब रहेको र खेल क्षेत्रमा लाग्ने युवाहरू कुलतबाटसमेत मुक्त हुने भएकाले प्रतियोगिता आयोजना गर्न लागिएको केसीले बताए ।

उनका अनुसार खेलमा विभिन्न विधामा उत्कृष्ट खेलाडीलाई नगदसहित पुरस्कृत गरिने तयारी छ ।

जसअनुसार सर्वोत्कृष्ट खेलाडीले नगद १० हजार, उत्कृष्ट गोलरक्षकलाई नगद १० हजार, उत्कृष्ट डिफेन्डरलाई नगद १० हजार, उत्कृष्ट मिड फिल्डरलाई नगद १० हजार, उत्कृष्ट स्ट्राइकरलाई नगद १० हजार र सर्वाधिक गोलकर्ता खेलाडीलाई नगद १० हजारसहित ट्रफी र मेडलसहित प्रमाणपत्र वितरण गरिनेछ ।

यसैगरी प्रत्येक खेलका म्यान अफ दि म्याच हुने खेलाडीलाई नगद पाँच हजार प्रदान गरिनेछ । प्रतियोगितामा २२ लाख ५५ हजार रुपैयाँ खर्च हुने अनुमान गरिएको छ ।

अघिल्लो वर्ष भएको प्रतियोगितामा बिटिएफसी भगिमान तुम्बाहाम्फे फुटबल क्लब०तेह्रथुमले उपाधि जितेको थियो ।