काठमाडौं । कोशी राजमार्गअन्तर्गत विराटनगर महानगरपालिका–४ पिपल चोकनजिकै सोमबार बिहानका राति कार दुर्घटना हुँदा ४ जना घाइते भएका छन् ।

उत्तरबाट दक्षिणतर्फ आउँदै गरेको प्रदेश १–०२–०२९ च २२२१ नम्बरको कार दुर्घटनामा परेको प्रहरीले जनाएको छ । प्रहरीका अनुसार तीव्र गतिका कारण आफैं अनियन्त्रित भएर सडकको डीभाईडरमा ठोक्किँदा चालकसहित ४ जना घाइते भएका हुन् ।

दुर्घटनामा कार चालक विराटनगर–६ का अन्दाजी २६ वर्षीय रियाज आलम, २४ वर्षीय दिलछात हुसेन, २५ वर्षीय अब्दुल रहिम र २७ वर्षीय मोहमद अबुजर घाइते भएका छन् । सामान्य अवस्थाका सबै जनाको नोबेल शिक्षण अस्पतालमा उपचार भइरहेको छ ।

दुर्घटनामा परेर कार क्षतिग्रस्त बनेको छ । घटनाको अनुसन्धान भइरहेको प्रहरीले जनाएको छ ।