काठमाडौं । नक्कली फेसबुक एकाउन्ट बनाएर महिलाको चरित्र हत्या गर्ने एक व्यक्तिलाई प्रहरीले पक्राउ गरेको छ ।

महिलाको फोटो, भिडियो बनाएर सामाजिक सञ्जालमार्फत दुःख, हैरानी दिने व्यक्तिलाई इलाम प्रहरीले पक्राउ गरेको हो । पक्राउ पर्नेमा भारत आसाम राज्य, जिल्ला नगाउँ, कोलियावर सुलुङ ढोलपानी घर भएका २१ वर्षीय प्रशान्त दास रहेका छन् ।

जिल्ला प्रहरी कार्यालय इलामका सूचना अधिकारी, डीएसपी मानबहादुर राईका अनुसार दासले फेसबुक एकाउन्टबाट चिनजान भएकी सूर्योदय नगरपालिका १ की महिलाको चरित्र हत्या गरेका थिए ।

ती महिलाको परिवारको फोटोसमेत सञ्जालमा राखेर चरित्र हत्या गरेको आरोप उनीमाथि लागेको छ । प्रहरी चौकी फिक्कलबाट खटिएको प्रहरीले सूर्योदय नगरपालिका १० फिक्कल चोकबाट उनलाई पक्राउ गरिएको हो । पक्राउ परेका दासबाट उनको साथमा भएको मोबाइल १ थानसमेत बरामद गरेको छ ।

पक्राउ परेका दासमाथि विद्युतीय कारोबार ऐन २०६३ को दफा ४७ बमोजिम अपराध मुद्दामा जिल्ला अदालत इलामबाट १० दिन म्याद थप गरी आवश्यक अनुसन्धान भइरहेको प्रहरीले जनाएको छ ।