काठमाडौँ । काठमाडौँको लाजिम्पाट स्थित पानीपोखरीमा कार्तिक ११ मा घरजग्गा व्यवसायी ३५ वर्षीय विक्रम लामामाथि आक्रमण भयो ।

नुवाकोटको ककनी गाउँपालिका–६ घर भएर टोखा नगरपालिका–३ स्थित ग्राण्डी बस्ने लामा गम्भीर घाइते भएका छन् । नेपाल भूमि रियल स्टेटका सञ्चालक लामाको ग्रिन सिटी अस्पतालमा उपचार हुँदै छ ।

आक्रमणमा संलग्न शैलेन्द्र तामाङ उर्फ मार्सललाई पक्राउ गरेर अनुसन्धान भइरहेको जिल्ला प्रहरी परिसर काठमाडौँका एसपी नवराज अधिकारीले रातोपाटीलाई बताए । ४ जना मिलेर इनोभा अस्पतालको पार्किङमा विक्रम लामामाथि रड र हेल्मेटले निर्घात कुटपिट गरेको सिसिटिभी फुटेजमा देखिन्छ ।

मार्सललाई प्रहरी वृत्त महाराजगन्जको हिरासतमा राखिएको छ । उनी गुन्डा नाइके सानुभाइको ‘लडाकु’ भनेर चिनिन्छन् । यसअघि पनि कुटपिट मुद्दामा पक्राउ परेर उनी छुटेका हुन् ।

बिहान ११ बजेर ५० मिनेटमा उनलाई आक्रमण गर्ने मध्येका ३ जना अझै फरार छन् । पुरानो रिसिबिका कारण उनीमाथि आक्रमण भएको प्रहरीको प्रारम्भिक अनुसन्धान निष्कर्ष छ ।

दुई वर्षअघि विक्रमको कारणले एकजना युवक जेल परेको भनेर रिसिबी राखेर आक्रमण गरेको अनुसन्धानमा संलग्न प्रहरी अधिकृतहरू बताउँछन् ।