एक महिनादेखि रेसुङ्गा विमानस्थलमा अवरुद्ध
काठमाडौं । गुल्मीको रेसुङ्गा विमानस्थलमा एक महिनादेखि उडान अवरुद्ध भएको छ ।
खराब मौसमका कारणले असोज ४ गतेदेखि लगातार उडान अवरुद्ध हुँदै आएको नेपाल एयरलाइन्स रेसुङ्गा विमानस्थलले जनाएको छ । नेपाल एयरलाइन्सको ट्वीनेटर जहाजले हप्ताको २ दिन बुधबार र शुक्रबार उडान गर्दै आएको छ । चाडपर्वको समयमा लगातार उडान अवरुद्ध हुँदा नागरिकले सेवा लिन पाएका छैनन् ।
नेपालीहरुको दोस्रो ठूलो पर्व तिहार आउन हप्ता दिन मात्रै समय बाँकी छ । यही समयमा वर्ष दिनदेखि टाढा रहेका आफन्तहरु घर फर्किने समय पनि हो । यो समयमा हवाई यात्रामार्फत आफ्नो गनतव्यमा जाने कयौं नेपालीहरु रहेका छन् ।
तर, अहिले यही समयमा मौसम खराब देखाएर रेसुङ्गा विमानस्थलबाट उडान हुन सकिरहेको छैन् । महत्वपूर्ण चाड पर्वको समयमा लगातार उडान अवरुद्ध हुँदा नागरिक असन्तुष्ट छन् । रेसुङ्गा विमानस्थलका लागि काठमाडौंबाट बिहान ६ बजेर ३० मिनेट र काठमाडौंका लागि बिहान ७ बजेर ४५ मिनेटमा उडान हुने गरेको छ ।
बिहानी समयमा बादल लाग्ने गरेकाले लगातार उडान अवरुद्ध हुँदै आएको छ । यसको विकल्प खोज्नु पर्ने स्थानीयको माग छ । वर्षातको समयमा बिग्रेका र नयाँ बाटो विस्तारले बाटोले गर्दा काठमाडौंबाट गुल्मी आउन १२ घण्टाको बाटो अहिले झण्डै २२ घण्टा सवारी साधनमा कष्टपूर्ण यात्रा गर्नुपर्ने अवस्था रहेको छ ।
यात्रुको अत्याधिक चाप बढेपछि रेसुङ्गा विमानस्थलबाट साप्ताहिक तीन उडानको अनुमति पाएको छ । तर, पछिल्लो केही समयदेखि शुक्रबार मात्रै उडान भइरहेको विमानस्थलले जनाएको छ । हवाई यात्रामा गुल्मी सगं जोडिएसँगै पछिल्लो समय जिल्लाका पर्यटकीय स्थलमा अन्तर्राष्ट्रिय पर्यटन भित्रिन थालेका थिए ।
मौसम खराबको कारणले गत असारको दोस्रो साताबाट २ मिहनासम्म उडान अवरुद्ध हुँदै आएको थियो । पछिल्लो भदौ महिनामा केहि दिन उडान भएको थियो । तर, अहिले दशैं तिहार जस्ता महत्वपूर्ण चाडपर्वको समयमा लगातार उडान अवरुद्धा हुँदा नागरिकले सेवा लिनबाट बञ्चित भएका छन् ।
अहिले गुल्मीबाट काठमाडौंका लागि ७ हजार ८० र काठमाडौंबाट गुल्मीका लागि ७ हजार २८० रुपैयाँ भाडा रहेको छ । रेसुङ्गा विमानस्थल रेसुङ्गा नगरपालिकाको वडानम्बर–१० को सिमीचौरमा पर्दछ । जिल्ला सदरमुकाम तम्घासबाट करिब ५ मिलोमिटर कच्चीबाटो पछि विमानस्थल पुग्न सकिन्छ । विमानस्थलबाट गतवर्षको वैशाख २९ गतेबाट व्यवसायिक उडान शुरु गरिएको थियो ।
गुल्मीबाट धेरै जसो वृद्ध, बिरामी, सुत्केरीलगायतका नागरिकले सेवा लिदै आईरहेका छन् ।
सम्बन्धित खवर
आज सुनचाँदीको मूल्य घट्यो
लेटाङका किसान व्यावसायिक कफीखेती तर्फ आकर्षित
