काठमाडौं । प्रत्येक वर्ष आश्विन शुक्ल पूर्णिमाका दिन लाग्ने चोभार डाँडास्थित आदिनाथको मेला आज बिहानैदेखि शुरु भएको छ । कार्तिक शुक्ल पूर्णिमासम्म सञ्चालन हुने एक महिने मेला अवधिमा आदिनाथको भक्तिपूर्वक पूजार्चना गरेमा निरोगी हुने जनविश्वासका साथै छालासम्बन्धी रोग पनि नलाग्ने जनश्रुति छ ।

मन्दिरमा विभिन्न भाँडावर्तन, गरगहना चढाउने गरेको प्रचलन छ । भक्तजनले बिहानैदेखि बाजागाजासहित मन्दिरमा भजनकीर्तन गरिरहेका छन् । काठमाडौंबाट करिब नौ किलोमिटर दक्षिणमा अवस्थित सोही स्थलबाट काठमाडौं उपत्यकाको मनोरम दृश्य पनि देखिन्छ ।

आदिनाथ मन्दिरमा शिवपार्वतीको एकाकार मूर्ति छ,जसलाई शिव र शक्तिका रूपमा बौद्ध धर्मावलम्बीहरूले पनि अर्चना गर्दै आएका छन् । हिन्दू तथा बौद्ध अनुयायीका निम्ति यो साझा संस्कृतिक धरोहर रहेको छ ।