कहाँ पुग्यो छोरो
सम्पर्क हुँदैन फोनमा
जिउँदै छ कि मर्‍यो
पुगेछ रेड जोनमा

एजेन्टको विश्वासमा
गएथ्यो भनी कमाउन
रुसी सेनाको पोसाकमा
पुगेछ बन्दुक समाउन

सपना ठुलो बोकेर
मेहनत गरेथ्यो पढ्न
देशमा यस्तो के भयो
जानुपर्‍यो युद्धमा लड्न

बुझ्न खबर भनेर
सरकारी निकाय धाएँ
पत्तो लागेन कतै केही
हे दैव कस्तो दुःख पाएँ
‘ल्याइदेऊ मेरो बाबु’
भन्दै रुन्छिन् बूढी
कस्तो पिर म बूढोलाई
रुँदैछु मुटु चुँडी

हाम्रो देश कहिले होला
छोडी जान नपर्ने
एयरपोर्टमा बिदाइ गर्दै
आँसु झार्न नपर्ने