भोजपुर । भोजपुरको पूर्वी अरुण गाउँपालिका वडा नम्बर ७ सिक्रेटारमा प्रधानमन्त्री रोजगार कार्यक्रमअन्तर्गत सूचिकृत बेरोजगार व्यक्तिहरूमध्ये रोजगारीका लागि छनौट गरिएका लाभग्राहीहरूलाई लक्षित गरी एक दिने अभिमुखीकरण कार्यक्रम सम्पन्न भएको छ।

अरुण गाउँपालिका रोजगार सेवा केन्द्रको आयोजनामा सम्पन्न यस कार्यक्रमको उद्देश्य रोजगारीका लागि छनौट भएका व्यक्तिहरूलाई कार्यस्थलमा आवश्यक ज्ञान तथा जानकारी प्रदान गर्नु रहेको थियो। कार्यक्रममा सहभागीहरूलाई उनीहरूको कार्यक्षेत्र, जिम्मेवारी तथा पालना गर्नुपर्ने नियमहरूबारे विस्तृत रूपमा जानकारी दिएको थियो ।

वडा अध्यक्ष कुमार थापाको अध्यक्षता तथा रोजगार प्रमुख तिलबिक्रम तामाङ र प्राविधिक संजय बयलकोटीको विशेष सहजीकरणमा कार्यक्रम सम्पन्न भएको थियो । कार्यक्रमा रोजगारीका अवसरहरू, कार्यस्थलमा अपनाउनुपर्ने सावधानी तथा काम गर्ने तरिकाबारे विशेष प्रशिक्षण प्रदान गरिएको थियो।

कार्यक्रमका क्रममा रोजगारी प्रक्रियालाई व्यवस्थित र पारदर्शी बनाउनका लागि छनौट भएका लाभग्राहीहरूलाई परिचयपत्र वितरण गरिएको थियो।

वडाध्यक्ष थापाका अनुसार प्रधानमन्त्री रोजगार कार्यक्रमले बेरोजगार, गरिव तथा विपन्न नागरिकलाई रोजगारीमा संलग्न गराउनुका साथै उनीहरूको सीप अभिवृद्धि गर्न महत्त्वपूर्ण भूमिका खेलेको छ।

यस प्रकारका कार्यक्रमले रोजगारी पाउन कठिनाइ भोगिरहेका स्थानीयहरूलाई आत्मनिर्भर बनाउन मद्दत पुर्याउने विश्वास व्यक्त गरिएको छ।