भोजपुर । भोजपुरको पुर्वी अरुण गाउँपालिकाले फालिटारबाट बतासे हुँदै याकु जोड्ने सडकको निर्माण कार्यको निरीक्षण सम्पन्न गरेको छ। उक्त निरीक्षण कार्यक्रममा गाउँपालिका अध्यक्ष शालिकरामा खत्री, उपाध्यक्ष बिनिता ढकाल र स्थानीय बासीहरूको उपस्थिति रहेको थियो।

सडक निर्माणको काम हरेलो कन्स्ट्रक्सन एण्ड ट्रेडर्स प्रा.लि. द्वारा सञ्चालित भइरहेको छ, जसको लागत रु १ करोड २० लाख रहेको छ। यसमा अरुण गाउँपालिकाको १ करोड र ५ नम्बर वडा कार्यालयको २० लाख योगदान छ। निर्माण कम्पनीका अनुसार, यो सडकको काम यही आर्थिक वर्षको अन्तिमसम्ममा सम्पन्न हुनेछ।

सदरमुकाम जानका लागि स्थानीय बासिन्दाले भोगिरहेका कठिनाइलाई ध्यानमा राखी, यस कार्यलाई प्राथमिकताका साथ अघि बढाइएको छ। पालिकाले सबै वडाका लागि सदरमुकामसम्मका बाटोको निर्माणलाई तीव्र गति दिएको पालिका अध्यक्ष खत्रीले बताए ।

यस सडकले स्थानीय बासिन्दाको आवतजावतमा सहजता ल्याउने र अरुण गाउँपालिकामा यातायातको पहुँचलाई थप सशक्त बनाउने अपेक्षा गरिएको छ।