काठमाडौँ । धरान उपमहानगरपालिकाका नगर प्रमुख हर्कराज राईले आफूविरुद्ध समाचार लेख्ने दुई जना सुनसरीका पत्रकारलाई कारबाहीको माग गर्दै गृहमन्त्री रमेश लेखकलाई पत्र लेखेका छन् ।

नगर प्रमुख राईले गृहमन्त्रीलाई लेखेको पत्र आइतबार सामाजिक सञ्जालमा पोष्ट गर्दै खोज पत्रकारिता केन्द्रका पत्रकार गोपाल दाहाल र नेपाल पत्रकार महासंघ सुनसरीका अध्यक्ष जनक ऋषिलाई कारबाही गर्न माग गरेका हुन् ।

उनले पत्रकारद्वयले आफूलाई नक्कली माओवादी भनेर समाचार लखेको र सामाजिक सञ्जालमा सेयर गरेर जननिर्वाचित नगरप्रमुख जस्तो पदलाई अपमान र अनादार गरेर भ्रम फैलाएको भन्दै यस्तो विकृति रोक्न पत्रमार्फत माग गरेका छन् ।

पत्रको बोधार्थ कोशी प्रदेश प्रहरी कार्यालय, जिल्ला प्रशासन कार्यालय इनरुवा र इलाका प्रहरी कार्यालय धरानलाई समेत दिइएको छ ।