भोजपुर । भोजपुर जिल्लाको पुर्वी अरुण गाउँपालिका वडा नं ७ स्थित ढुङ्ग्रे खोलामा एक मानव कंकाल फेला परेको छ।

सो कंकालसँगै महिलाले लगाउने कपडा समेत भेटिएको छ,जसले यो अवशेष कुनै महिलाको हुन सक्ने संकेत गरेको छ। प्राप्त जानकारीअनुसार, फेला परेको कपडा र कंकालको आधारमा दुई तीन वर्षअघि हराएकी मानसिक सन्तुलन गुमाएको एक महिलाको हुन सक्ने अनुमान गरिएको छ। उक्त महिला अरुण गाउँपालिका तिलबारीबाट हराएकी थिइन्।

अवशेष र कपडालाई प्रमाणका रुपमा राख्दै घटनाको विस्तृत छानबिनका लागि प्रहरीद्वारा डीएने परीक्षणका लागि पठाइएको छ। तर, हालसम्म भने यसको ठोस प्रमाण पुष्टि भएको छैन। परीक्षणबाट पुष्टि भएपछि मात्र कंकालको पहिचान र उक्त महिलासँग सम्बन्धित रहेको सुनिश्चित हुनेछ।

प्रहरीले यस घटनाबारे थप अनुसन्धान जारी राखेको र यसबाट सघाउ पुग्ने सबैलाई सहकार्य गर्न अपिल गरेको छ।