काठमाडौँ । लोकतान्त्रिक समाजवादी पार्टी लोसपा नेपालले राष्ट्रिय स्वतन्त्र पार्टी रास्वपाका सभापति रवि लामिछाने पक्राउपछि सो पार्टीका नेता तथा कार्यकर्ताले गरेको आन्दोलनप्रति आफ्नो ध्यानाकर्षण भएको जनाएको छ ।

पार्टीका प्रवक्ता अभास लाभले बुधवार एक विज्ञप्ति जारी गर्दै संसद्ले गठन गरेको संसदीय समितिको प्रतिवेदन कार्यान्वयनको छानबिन र अभियोजनलाई प्रभावित पार्ने ढंगले रास्वपा लगायतका अन्य संस्था र व्यक्तिको तर्फबाट भइरहेको असामाजिक, अमर्यादित र अवाञ्छित गतिविधिप्रति गम्भीर ध्यानाकर्षण भएको बताएका छन् ।

रास्वपाकै सांसदहरूको सहभागिता रहेको संसदीय छानबिन समितिले तयार पारेको प्रतिवेदन कार्यान्वयनलाई सो पार्टीका नेताहरूले प्रभावित गर्न खोजेको आरोप लोसपाले लगाएको छ ।

कुनै पनि फौजदारी मुद्दाको अनुसन्धान, अभियोजन र कार्यान्वयनलाई स्वतन्त्र, निष्पक्ष र सर्वसम्मत बनाई फौजदारी अभियोगविरुद्ध न्याय निरूपण गर्न गराउन सबै नागरिकको कर्तव्य रहेको उल्लेख गर्दै लोसपाले राजनीतिक दल, संघ–संस्था, सरकारी निकाय, सञ्चार जगत एवं आम नागरिकले निष्पक्ष रूपमा लाग्नुपर्ने राष्ट्रिय सार्वभौमिक अपरिहार्यता रहेको लोसपाले उल्लेख गरेको छ ।

राष्ट्रसेवकलाई कानुन बमोजिम तोकिएको काम गर्न नदिने वा कर्तव्य पालना गर्न निरुत्साहित गर्न कुनै पनि असामाजिक गतिविधि र क्रियाकलापलाई तत्काल रोक्न सम्बन्धित निकायलाई लोसपाले ध्यानाकर्षण गराएको छ ।